[NEWS] 【韓流】《花樣爺爺》Q版人物圖曝光！李瑞鎮爛衫爛褲似乞兒 @ CJWFC

建立時間: 0326 HK 蘋果日報

韓國tvN大熱綜藝節目《花樣爺爺》第三季喺聽日就會首播，劇組噚日就喺facebook公開一輯爺爺們包括：李順載、申久、朴根瀅同白一燮以及兩位「阿四」崔智友同李瑞鎮嘅卡通版人物介紹圖，再次引起大家關注。

為咗配合節目今次喺希臘取景，劇組喺公開圖片入面就將爺爺們、崔智友同李瑞鎮變身成為卡通版嘅希臘神話人物，仲各自為佢哋配上名稱同介紹。

當中，李順載就被稱為「H1（即爺爺一號）順宙斯」，仲手拎閃電，展現出佢喺團中有幾霸氣，而申久就係「H2海神久賽頓」、朴根瀅就叫「H3太陽神根波羅」，而白一燮就係「H4大力士海力克燮」，佢哋每個人亦有被配上唔同嘅裝容，非常得意。

至於兩位「阿四」，崔智友就被稱為「阿四女神佛洛狄忒」，仲被配上皇冠同花花，好高貴o架，但佢拍檔李瑞鎮就可憐，被稱為繼續「阿四瑞鎮宙斯」之餘，仲要冇皇冠、冇靚衫，兼著住爛衫爛褲，好似乞兒咁，仲擺出一副可憐樣，令網友更加好奇佢哋嘅希臘之旅。