有節目公開劉在錫同崔智友保養秘訣


2015年07月28日 HK 蘋果日報
    

香港有羅霖、溫碧霞等美魔女代表,韓國亦有韓劇《誘惑》公認靚女崔智友做代表。

友姐今年雖然已經40歲,但無論係佢嘅心境又好、外貌都好,都仲好似20多歲嘅後生女咁,令好多人都好奇究竟友姐係食乜嘢大。

而噚日有節目就爆出友姐嘅保養秘方,原來黑山羊同埋紅參片就係友姐嘅秘密武器。節目公開友姐喺出道初期就已經有飲開由黑山羊中萃取出嚟嘅營養液,另外佢亦會日日用紅參片沖水飲,即使係拍緊綜藝節目《花樣爺爺》,友姐一起身就會飲紅參水,咁勤力,難怪友姐上鏡嘅時間,啲皮膚都好似剝殼雞蛋咁滑喇。

另外,節目亦爆料話「國民MC」劉在錫嘅保養方法就係狂食鮑魚。節目指幾年前當劉在錫老婆羅靜恩陀B嘅時候,朋友都送上鮑魚畀佢補身,點知劉在錫就一個人食晒所有鮑魚,仲上晒癮。

而專家就話鮑魚對男人體力好,所以劉在錫即使有時要連續拍30個鐘頭嘢都唔會攰,而佢老婆亦好有心,為咗迎合老公而專登用黃油搽鮑魚嚟烤畀佢食。

 

arrow
arrow
    全站熱搜

    CJWFC 發表在 痞客邦 留言(0) 人氣()