CJWFC

    
現年40歲嘅崔智友，喺新劇扮cute cute大學生。
  

2015.08.15 HK 蘋果日報

由韓國美魔女崔智友、男星李尚允同崔元英主演嘅tvN新劇《第二個二十歲》喺今個月28日就會正式首播，眾劇迷都好期待現年40歲嘅友姐喺新劇入面減齡廿年扮大學生會係點，而劇組近日就先後公開新劇預告片谷下劇。

喺最新兩條預告片入面，就主要以兩位男主角嘅方向出發。第一條預告就係以李尚允為主角，坐喺車入面嘅佢被以青春打扮嘅友姐係咁拍車，一時又拍下車門，一時仲爬上車頭，十足十一個野蠻細路女一樣。不過李尚允就不停擰轉頭逃避友姐嘅眼神，仲讀白話：「廿年前，有一個甩低我同另一個男人結婚嘅初戀對象，但係佢依家重新出現喺我面前，討厭。」

至於另一條片，就以崔元英為主。一開始友姐照舊都係以一個勁青春嘅打扮出現，仲孭住個書包喺課室門口跳跳紮咁行，點知就無啦啦被崔元英拉咗入房，崔元英仲好嬲咁一輪嘴對住佢話：「我唔知點解你要入讀我教嘅呢間大學，但如果我畀人炒嘅話就一定係你嘅錯，我唔係咁好蝦㗎。」點知崔智友就好唔耐煩咁答一句：「講乜嘢呀。」就走咗。

就咁睇兩條預告，就好好奇究竟友姐同呢兩個男人有咩牙齒印，搞到佢兩個都咁唔歡迎佢。
        

李尚允     

崔元英

嘩，友姐個樣