CJWFC

    
劇中宋智孝做出軌嘅女人
    
2016.10.01 HK 蘋果日報

今年時光飛逝，話咁快就到咗10月，今年日子已經過咗一大半了。

10月劇迷除咗可以追埋仲有6集嘅人氣劇《雲畫的月光》之外，亦都可以煲吓其他劇集，好似崔智友嘅《拖旅行箱的女人》、金荷娜嘅《通往機場的路》、允兒同池昌旭嘅《權慾叛戰》、IU同李準基嘅韓版《步步驚心》等，呢啲劇集喺10月繼續播出。

至於今個月就唔算有好多新劇提出，當中比較有睇頭就係宋智孝、李善均、BoA主演嘅JTBC新劇《老婆這週要出牆》，不過呢齣劇就要到月尾，即28號先有得睇，而粉絲最想睇除咗係智孝點樣演繹阿媽同老婆角色外，就係想睇智孝做出軌嘅女人，故事係講李善均無意間發現智孝嘅手機短訊內容，內容提到智孝將會同外遇對象約好去旅館，於是李善均就喺網上問其他網友意見，從而發生連串嘅故事。

KBS方面就有由秀愛同金英光主演嘅《住在我家的男人》，劇集將於24號首播，係講一個空姐同一個自稱係新手爸爸嘅故事，二人仲會發生一段姊弟戀。還有tvN嘅長壽喜劇《沒禮貌的英愛小姐》，今年已經播到第15季，故事係以講本身同「大長今」李英愛同名，但唔同樣兒嘅李英愛呢個角色所發生嘅故事，劇中由金賢淑飾演李英愛一角，劇集將於31號壓軸登場。

另外，由姜棟元和金靜華主演嘅經典韓劇《1%的可能性》，事隔13年再翻拍新版《1%的可能性》，男女主角就換成河錫辰同全素敏，故事同樣講富二代為了繼承遺產而被迫與小學老師發展感情。劇集原定由MBC喺上月見街，但改由DramaX喺網絡平台播放，劇集將於5號首播。

JTBC新劇《老婆這週要出牆》28號首播     

秀愛主演嘅《住在我家的男人》24號首播     

金英光同秀愛喺劇中展開姊弟戀

《沒禮貌的英愛小姐》31號首播     

河錫辰同全素敏主演嘅《1%的可能性》下周三首播