CJWFC

    
《鬼怪》12月2號首播
    

2016.12.01 HK 蘋果日報

2016年仲有一個月就完結，剩返呢個月，壓軸登場嘅韓劇唔算太多，但貴精唔貴多，12月主打兩部必睇韓劇，就係《鬼怪》同《花郎》。

tvN嘅《鬼怪》係《太陽的後裔》編劇金恩淑嘅最新作品，由《屍殺列車》嘅男星孔劉擔正，夥拍《奶酪陷阱》嘅金高恩同埋李棟旭、劉仁娜等主演，劇情請孔劉係一名已經成935歲嘅妖怪，佢因為長生不死所以好想結束生命，而佢要搵到人類妻子先可以結束生命，於是孔劉就遇到高三生金高恩，仲展開同居生活。

《鬼怪》因為有《太陽》編劇，加上有人氣電影《屍殺》男星孔劉做男主角，所以未開播已經受到大家關注，視為今年嘅壓軸韓劇，劇集將於聽日首播。

至於KBS《花郎》就係先拍後播嘅劇集，早於今年3月已開拍，劇集由朴敘俊、朴炯植及高雅娜主演，朴敘俊同朴炯植因為同時愛上高雅娜，但高雅娜卻唔可以同其他外族結婚，更慘成為官宮廷中權力鬥爭嘅犧牲品，將於19號首播。

而JTBC嘅《所羅門的偽證》係改編自日本作家宮部美幸同名小說，係一部懸疑劇集，講喺聖誕節時喺一所中學發生嘅學生死亡事件，學生們從中搵出真相，劇集將於9號播出，並由金賢秀、張東尹、曹在顯等出演。

另外，如果以上嘅韓劇都唔夠吸引，咁呢套由7大男神夥拍崔智友出演嘅網劇《七次的初吻》(前譯：第7次初吻)必定夠吸引，呢齣網劇將於5號推出，並會於周一及周四早上10時(韓國時間)喺Naver TV cast播出，網劇由樂天免稅店投資兼製作，並邀得李敏鎬、李準基、李鍾碩、池昌旭、朴海鎮、澤演、EXO成員Kai做男主角，女主角則由《好運羅曼史》中扮演黃靜茵好朋友嘅李初熙擔任，提卡士就一定呢套殺晒。

《花郎》12月19號首播     

《所羅門的偽證》12月9號首播     

網劇《七次的初吻》卡士強勁，5號有得睇