2014.07.01 / HK 蘋果日報
嚟港拍攝SBS新劇嘅崔智友同權相佑,今日就各自活動。11點幾權權就同兩位工作人員返酒店,權權一見有記者就用手遮面,聽到記者同佢講早晨就微笑任影。
一個返酒店,另一個就出門口喇。幾分鐘後,崔智友就同幾位工作人員出門上車,之後架車就過海去到ifc。不過佢一落車見到記者,就好驚訝,其中一位女工作人員仲係咁擰頭嗌「no」,唔知係咪怕記者打擾到佢shopping嘅雅興。崔智友上完電梯就即時調頭落樓,仲狂跑落電梯上車。
行唔成街,之後就惟有原車折返酒店抖吓啦。話時話,今日港島有7·1遊行,智友你雖然著白衫襯晒大會主題,仲隱約透黑bra低調地性感,不過今日都係唔好過海住喇。
全站熱搜
留言列表