CJWFC

2014. 08.13 / HK 蘋果日報

 

權相佑、崔智友主演嘅《誘惑》噚晚播到第10集，收視雖然同上集一樣保持8.6%，但因為撞正同檔嘅《Trot戀人》大結局，搞到《誘惑》噚晚收視再跌至包尾位置，池賢宇、鄭恩地、申成祿主演嘅《Trot戀人》有8.9%，丁一宇、U-Knows主演嘅《巡夜人日記》就仍然穩佔冠軍位置，有11.3%收視。

《誘惑》噚晚一集講到車碩勳(權相佑飾)從巴西返回韓國，於是即刻去搵劉世英(崔智友飾)，仲話想去世英公司工作，其實世英內心好開心，不過佢就故意擺出高傲姿態，最終碩勳仍重新返回世英公司幫佢。另一邊廂，碩勳個前妻羅虹珠（朴河宣飾）被姜民宇(李廷鎮飾)個阿媽以為佢貪錢而想接近佢兒子，及後知道虹珠係真心對待佢個孫，不過虹珠唔想人覺得佢離婚後就好易得手，所以即使民宇多次約佢，佢都拒絕。民宇未有放棄，虹珠答應同民宇一齊參加聚會，點知去到先知碩勳同世英都結伴去，預示四角關係正式展開。

此外，噚晚大結局嘅《Trot戀人》，眾演員池賢宇、鄭恩地同申成祿噚日就出席劇集嘅煞科宴儀式。