CJWFC

權權今日宣佈太太懷女嬰。
    

2014.08.18 / HK 蘋果日報

韓劇《天國的階梯》拍檔權相佑同崔智友，今日現身首爾日山，出席劇集《誘惑》嘅記者會。

記者會上，權權就大爆太太孫泰英刻意唔睇《誘》劇，權權話：「可能大多數我演出嘅劇集，都係愛情劇，所以佢唔會睇我拍嘅劇。不過因為佢成日都會聽到身邊人討論劇情，所以有時都會同我討論。」

被問到喺劇中佢飾演一個同老婆離婚之後，就同第二個女人見面嘅男人，感受如何時，權權表示：「其實都聽到好多觀眾話，離婚之後唔係應該需要啲時間去整理情緒，之後先見第二個女人咩？！我喺拍嗰時都諗過好多，但當我嘗試去了解車錫勛（劇中角色）時，就產生咗同感。雖然喺一段男女關係入面，一方應該處理好晒先開始另一段感情，咁先係理想，不過現實中其實好多人都好自私。」

此外，權權亦有透露懷緊第二胎嘅太太嘅近況，仲大爆第二胎係囡囡添！權權：「太太同BB都好健康，早前太太懷孕嗰時，因為未夠三個月，所以唔可以公開BB嘅性別，不過0依家可以同大家講BB係個女仔，胎名為Heart。」

另外，由李真旭同CNBLUE成員鄭容和主演嘅《三劍客》，前晚喺tvN播出第一集，得到1.82%收視，成績唔錯。