CJWFC

    
李瑞鎮於節目中自爆私底下成日見崔智友，令人更好奇二人嘅關係。

    
玉澤演表示李瑞鎮同崔智友好似夫婦。

2015.07.18 HK 蘋果日報

韓國女星崔智友因為跟李瑞鎮合作演出綜藝節目《花樣爺爺》而傳出緋聞，而呢對歡喜冤家早前就再度合作，於噚日播出嘅節目《一日三餐》中，崔智友以新一集嘉賓登場，而節目主持李瑞鎮第一個反應係：「前日見面時，都冇聽你（崔智友）講會演出。」自爆二人私底下經常見面，令觀眾更加懷疑二人係唔係秘密拍拖。

節目中，當崔智友以嘉賓身份登場時，李瑞鎮即上前迎接，又話：「點解突然嚟嘅？前日見面時都冇講。」而友姐一見緋聞男友即露出燦爛笑容，喺李瑞鎮面前更十足十大細路，二人氣氛甜蜜。

另外，為咗準備早餐，友姐同李瑞鎮一早就不停吵鬧，同場另一男主持玉澤演就表示：「我第一次見到李瑞鎮咁自在嘅一面，佢哋兩個之間嘅化學反應係似夫婦，有種過咗戀愛初期嘅感覺，吵吵鬧鬧嘅樣子非常美好。」

當工作人員問李瑞鎮：「因為有崔智友，所以應該感到好踏實吧？」李瑞鎮就鬼馬地答：「崔智友？佢應該唔識煮飯。」同時不經意地露出甜笑。