CJWFC

2015.09.15 HK 蘋果日報

    
崔智友個學生妹look真係好鬼青春

點解點解，友姐13年前個樣冇變過

韓流天后崔智友近日首次拍攝收費電視台tvN劇集《第二個二十歲》，收視口碑叫好又叫座，比起佢對上孖權相佑拍攝嘅《誘惑》成績好好好多，而今次友姐為咗新劇亦好賣力，由於佢喺劇中要扮演原本係一名家庭主婦，因為中學時懷孕被迫放棄校園生活，婚後亦專注家庭同湊B，因為老公要求離婚關係，令友姐決定再次展開讀書生涯。

而友姐喺劇中除咗會跳舞外，仲會着上校服，施展制服誘惑，不過40歲嘅友姐着起校服個look真係好鬼青春，唔少女性都好羨慕佢keep得好好。

其實友姐唔係第一次着校服拍戲，早於2002年拍攝《冬日戀歌》時，佢就已經着住校服拍攝，當時友姐嘅實際年齡係27歲，亦都喺劇中扮演高中生，即使同高中生年紀相差成10年，但友姐演繹起來都依然說服力十足，完全唔似27歲。

而今次友姐事隔13年再次挑戰高中生，最令人驚訝係佢似乎同13年前個樣都冇點變過，唔少網民將友姐13年前嘅學生造型同今次新劇對照，竟然發現冇乜大分別，網民都留言激讚友姐keep得好好，仲話：「崔智友係唔係食咗防腐劑？佢嘅外貌竟然同13年前一模一樣，完全冇變過呢！」、「崔智友根本就係美魔女啊！」、「崔智友隔咗13年再次扮成高中生，但樣子睇起嚟好似仲比13年前仲要年輕呢」。