CJWFC

2015.09.18 HK 蘋果日報

友姐收花好鬼冧

友姐讀劇本讀到扁晒嘴

由崔智友、李尚允主演嘅tvN新劇《第二個二十歲》開播以嚟收視都好好，今晚將會播出第七集，今晚劇情會講到李尚允終於知道友姐患癌係誤診，仲因而好開心，不過開心只係好短暫，因為李尚允見到友姐喺老公崔元英面前絲毫唔敢反抗，佢就因而大感生氣，又向友姐發脾氣，十足十成日鬧交耍花槍嘅高中生情侶。

而劇組今日亦都公開最新劇照，只見收到花嘅友姐大感驚訝之餘，同時亦都難掩幸福嘅表情，而花上亦有一張紙條留言：「送給我，一直在關注的人」，不過劇照就未有公開到底何方神聖送花比友姐，令觀眾對送花人嘅身份大感好奇。而站喺友姐身邊，但事實上係介入友姐婚姻嘅第三者朴孝珠見到友姐收花時就好鬼妒忌。

由於劇集受歡迎，所以劇組將於聽日上午重播《第二個二十歲》，並會一口氣播出頭七集，等到未觀眾可以重溫劇情，亦可以等未睇劇嘅觀眾一氣呵成追劇。

另外，因為劇組經常喺大學取景，所以有唔少網民都拍到劇組拍攝嘅情況，其間就見友姐同李尚允拍攝緊外景，而友姐拍攝時亦不時認真熟讀劇本，當遇到難背嘅對白時，佢仲不自覺咁扁嘴，十分可愛