[NEWS] 【韓流】40歲崔智友新劇吹起校園look－CJWFC

2015.10.03 HK 蘋果日報

現年40歲嘅崔智友近日憑tvN人氣劇《第二個二十歲》成為新聞人物，劇集不單收視理想，就連劇中友姐嘅一身大學生打扮都掀起熱潮。

劇中友姐飾演一名19歲時因為未婚懷孕而被迫放棄原本嘅人生，轉而做全職家庭主婦，自19歲起友姐就冇再踏足社會，直到38歲之年，友姐因為丈夫話要離婚，於是佢就毅然再次返大學讀書，仲同愛兒同入同一間大學，雖然入到大學個個都叫佢大媽，但係友姐幾經辛苦、排除萬難，終於同細佢一半嘅同學仔打成一片，而佢進入大學時亦刻意打扮隨意及較年輕。

當中友姐有三個大學生造型都會喺劇中經常見到，當中佢為咗拉近同同學仔距離，就着簡單長褸、貼身牛仔褲，再襯平底鞋，甚至棒球帽，即時年輕不少。

另外，由於踏入秋季，友姐就穿上韓國女大學生最鍾意嘅針織衫及冷外套，內襯白色衫，即時增添時尚感。

最後喺髮型方面，友姐第一次上堂時就梳咗個非常高雅嘅髮型，即時予人成熟幹練嘅感覺，感覺似大嬸，但後嚟佢嘅髮型就較隨意，亦都經常梳起馬尾，頓時年輕不少，亦有索性將長髮披肩，清純可愛。

此外，噚日《第二個二十歲》劇組就公開友姐同李尚允嘅差啲就錫錫嘅照片，令到粉絲都超級期待，到底友姐同李尚允嘅感情係唔係會更進一步。