[NEWS] 【韓流】回到20歲！女星扮學生妹鬥後生 @ CJWFC

近日韓劇興玩「回到20歲」風，女星們都先後喺劇中扮學生

2015年10月23日 HK 蘋果日報

韓國多產「童顏美人」，好多女星即使實際年齡已經踏入3字頭或4字頭，但個樣仍然好似廿歲女咁。而最近韓劇就吹起一陣「回到20歲」風潮，好星好似崔智友、河智苑、金喜善同申敏兒都喺劇集入面扮學生妹大玩「那些年」，仲要個個都被網民激讚。

早前同男星李尚允合作tvN劇集《第二個二十歲》嘅友姐，雖然今年已經40歲，不過無論係個樣又好，心境都好，都同廿歲後生女無異。喺劇集，友姐又扮中學生、又扮大學生，着住校服示人嘅友姐順眼又清純，拍落一班後輩度仲毫無違和感，難怪畀網民話佢似食咗「防腐劑」，愈變愈後生添。

今年已經38歲嘅金喜善，佢早前亦喺劇集《憤怒的媽媽》入面扮演一個為咗受欺凌嘅囡囡而偽裝成女高中生，潛入學校抱打不平嘅角色。對比友姐嘅清純女學生，金喜善嘅學生妹形象就偏向火爆型同粗魯，但網民亦都好受落，仲話金喜善扮到似足學校惡大姐咁。

而喺劇集《愛你的時間》入面，河智苑亦都有扮學生妹嘅場面，不過佢個學生look就較為薯仔，又戴大框眼鏡，又戴頭箍，真係好似回到80年代咁。向來都童顏嘅佢，着住校服仲即時減齡廿年，變到好似個十幾歲O靚妹咁，完全睇唔出佢今年已經37歲。

至於女星申敏兒近日同樣為新劇《Oh My Venus》扮演學生妹，雖然仲未知申敏兒為咩要扮學生，不過劇組近日就公開幾張申敏兒孭住書包、着住校服扮學生妹嘅相，睇見佢企喺學校門口望向右邊好似唔知得邊個咁，唔知真係以為今年已經31歲嘅佢仲讀緊書咋。