CJWFC

2016.04.21 HK 蘋果日報

    
    
 喬妹(左)同金智媛令到代言產品銷量急升

有傳宋仲基身價達4千萬港元

自從新一齣神劇《太陽的後裔》誕生後，再次掀起一股韓劇追潮，而劇集亦都帶挈劇中演員賺過盆滿砵滿。

當中自然以男主角宋仲基吸金能力最勁，自從佢憑《太陽》爆紅後，吸引逾百廣告商邀請佢做代言人，而佢聽日又會飛嚟香港出席時裝品牌Dior Homme嘅活動，認真豬籠入水。而日前佢已成為新一任濟州航空嘅代言人，再次引證佢升呢做韓流明星之列，有傳宋仲基嘅身價越炒越高，當中更傳出身價高達60億韓圜（約4,140萬港元），認真誇張，而下月開業嘅鬥山免稅店為咗喺市場上展開攻勢，正密謀同宋仲基傾談合約。

而其他免稅店亦同樣競爭十分激烈，作為海外遊客特別係來自內地嘅遊客，免稅店就係遊客嘅掃貨主場，以往擔任免稅店代言人嘅都屬一線巨星，如裴勇俊、李敏鎬、金秀賢、崔智友等，有指新羅免稅店除咗邀請李鍾碩做代言之外，亦同喬妹保持密切聯繫，欲將喬妹簽下成為代言人。

另外，喬妹喺《太陽》中經常搽Laneige嘅唇膏，令到該品牌嘅銷量激增，特別係喬妹所用嘅唇膏就被人搶購一空。就連飾演尹明珠嘅金智媛都因為劇集帶挈，佢代言嘅化妝品牌Dr.G同佢續咗約，而品牌旗下產品「金智媛防曬霜」亦因為《太陽》播出街後銷量增多10倍，可見劇集受歡迎亦推動咗劇中嘅產品銷量，難怪《太陽》中有咁多植入式廣告啦，搵銀至上，所以被人批評太明顯佢哋都集集植入廣告。