CJWFC

電影拾點

2016年5月28日 星期六

導演：박현진
主演：李美妍、劉亞仁、崔智友、金柱赫、姜河那、李絮
香港上映日期：5月26日
預告：https://youtu.be/TjOgYJ-Vtt4
簡介：電視台女編劇趙景雅(李美妍 飾)重出江湖，卻遭偶像巨星盧振宇(劉亞仁飾)處處針對；被未婚妻甩掉的暖男成燦(金柱赫 飾)陰差陽錯，與投資失利的美魔女周蘭(崔智友 飾)同居；擅寫情歌的音樂人秀浩(姜河那 飾)情竇初開，對情場老手娜妍(李絮 飾)一見傾心；三對閃爆面書的俊男美女，一於跳出虛擬天地，投進真實愛海！

1. 近年社交媒體已經深入各個階級，喺呢個手機仲緊要過自己條命嘅年代，韓國就借題發揮講述三對男女相愛嘅故事。

2. 李美妍+劉亞仁嘅故事只佔較短編幅(可能同當時劉亞仁忙都無咩期拍有關)，但故事亦極快就進入困局：一直咬住係咪親生仔呢個位。

3. 而崔智友+金柱赫就意外地有火花，兩人放低身段去到盡(尤其係崔智友)！點樣用Facebook嚟打造一個良好形象呢個位真係引起唔少人共鳴！

4. 最後姜河那+李絮又玩返難言之隱呢條橋，唯一有分別係竟然男方介意自己有缺憾，覺得好難堪。

5. 劇本同香港翻譯各自嘅問題令到劇情唔連貫：崔智友開頭話唔做空姐，去開鋪賣手袋，但之後完全無咗件事；而交代崔智友投資遇人不淑同劉亞仁昔日公關問題上，對白亦譯得太簡單而又攞唔到重心，令觀眾睇到一知半解。

6. 呢類拼盤式電影常見問題就係剪接奇差，例如幾年前套婚前撻Q日記咁，電影承接呢個"傳統"，頭半嘅剪接突兀；後半先至好返啲。

7. 為咗令三段故事有返啲關係，編劇安排李絮去貫穿其餘兩條線，但其實有無呢個必要呢？好多電影都會格硬屈到佢地有些少關係，不如直頭做三個獨立故事咪仲好。尾段幾位主角都扭去機場，當時幾驚佢又玩黃百嗚式賀歲片，要幾位主角係同一場合出現同做Ending，好彩電影並無咁做！

8. 黑超永遠係電影嘅宿敵，前年金雞sss盧海鵬同古天樂副超就反映到成班工作人員。而今次同樣事故就出現係劉亞仁身上，喺飛機個幕就見到好大塊白色反光布！其實只要細心啲就會搵到呢啲瑕疵，用後期執返佢總好過自暴其短。

9. 合理同適當嘅廣告植入係無問題同接受，而電影同不二情書一樣出現致命性問題：植入航空公司時出錯，電影有廉航Eastar Jet做贊助，後段竟然有該公司飛往倫敦嘅check in櫃檯！其實既然你一早知間公司根本就無呢條線，倒不如改咗係其他地方吧啦，宜家只係丟人現眼。

10. 其實呢啲愛情拼盤喜劇，都係典型嘅老土故事，入場只係為咗呢幾位好吸引嘅演員。同男/女朋友輕輕鬆鬆笑返場，都不失一個好選擇。