CJWFC

    
喬妹主演嘅劇集分別佔據冠亞軍

2018年06月03日 HK 蘋果日報   

KBS身為韓國嘅國營電視台，曾經推出過唔少膾炙人口嘅韓劇。根據近日進行嘅調查中，韓國人就嚴選自己最愛嘅KBS韓劇，當中日前來港嘅韓國女神宋慧喬連中兩元，頭三甲嘅韓劇中佢就佔咗頭兩位，可見女神揀劇認真有眼光。

根據調查顯示，韓國人最愛嘅KBS韓劇就係前年開播嘅神劇《太陽的後裔》，《太陽》當年令到亞洲掀起一股「太陽狂熱」，亦令到雙宋紅爆燈，由於《太陽》題材以軍人同醫生戀愛故事為主，又遠赴到希臘拍攝，靚人靚景下，令到《太陽》曾創下最高超過40%嘅收視紀錄，堪稱「國民劇集」。同時《太陽》亦為兩位主角喬妹同埋宋仲基拉紅線，令兩人由戲裡愛到戲外，現實生活中更結為夫婦。

而第二名同樣屬喬妹於2000年主演嘅《藍色生死戀》，《藍色生死戀》係吹起韓風嘅始祖劇集，雖然播出就快20年，但依然深受劇迷歡迎。《藍色生死戀》由喬妹孖兩大型男宋承憲及元斌主演，劇情雖然老土，講冇血緣嘅兄妹相戀故事，雖然悲劇收場但依然深得民心。

第三名同樣係經典韓劇，就係由裴勇俊、崔智友主演嘅《冬日戀歌》，劇集令裴勇俊紅到爆燈，亦封為「師奶殺手」，劇集同樣貫徹昔日韓劇作風，大玩失憶、兄妹戀等橋段，最後裴勇俊仲失埋明0添，雖然劇情唔合情理，但係劇迷心目中地位就好超然，劇集仲令裴勇俊同友姐喺日本爆紅。

至於由朴寶劍同金裕貞主演嘅《雲畫的月光》則排第四名。

另外，喬妹噚日離港返回韓國，喺韓國仁川機場時，喬妹見到粉絲都親民揮手同簽名。

《太陽》令雙宋由戲裡愛到戲外     

《藍色生死戀》

《冬日戀歌》

《雲畫的月光》