[NEWS] 【動大事2018】友姐閃婚太陽做人夫具荷拉性暴力風波 @ CJWFC

韓流2018年大事回顧

2018.12.24 HK 蘋果日報

韓國演藝圈今年受「#MeToo」風暴影響，令南韓娛樂圈連環爆出多宗性騷擾或性侵事件，同時韓國女團KARA嘅27歲前成員具荷拉與舊愛嘅性暴力風波亦成為熱話。而今年繼續有多位男星入伍，當中包括天團BIGBANG嘅三位成員，而成員太陽更成為隊中第一位人夫。至於43歲嘅「催淚天后」崔智友終於嫁杏有期，今年3月閃婚拍拖1年多嘅圈外男友，正式升呢做人妻。

(一)崔智友閃婚
現年43歲嘅《天國的階梯》女星崔智友今年3月突然宣佈結婚，驚爆全城。友姐被爆與拍拖逾1年、樣貌俊俏嘅30多歲IT男拉埋天窗，由於友姐對老公身份十分保密，令到外界傳出唔少猜測。當中曾有韓媒踢爆佢老公姓李，細過佢9歲，係手機應用程式公司老闆，同時又有日媒爆料，指友姐老公曾屬江南區嘅紅牌牛郎，友姐對老公一見鍾情，但因韓國社會十分重視家世學歷，所以友姐為隱瞞老公過去，曾花錢幫老公成立公司。

(二)具荷拉性暴力風波
韓國女團KARA嘅27歲前成員具荷拉今年9月被爆與同齡嘅髮型師男友崔鐘範互毆先後到警署接受調查，具荷拉更曾公開婦產科診斷書，指自己子宮及陰道出血。及後韓媒報道具荷拉被前度以性愛影片作出威脅，又公開具荷拉向對方下跪嘅CCTV影片，事件轟動全城。警方一度申請拘捕崔鐘範，事後佢獲當庭釋放，但警方經調查後，確認崔鐘範曾喺具荷拉唔知情下偷拍女方照片，所以就會追加崔鐘範涉嫌性暴力嘅罪行。

(三)「#MeToo」風暴
去年「#MeToo」風暴席捲全球，今年更喺韓國掀起另一場「#MeToo」風暴，當中多位男星被爆涉性騷擾或性侵，包括《聖殤》名導金基德、韓劇《Cross》男星曹在顯、韓片《與神同行》男星吳達洙及崔日和、韓劇《師任堂，光的日記》男星崔用閔、韓片《鳴梁》男星金太勳等。當中韓版《步步驚心》男星趙敏基今年被爆喺大學任助教時涉嫌性騷擾逾10名女學生，今年3月趙敏基到警署受查前，被大學炒魷的他隨後被發現於停車場倉庫上吊身亡，終年52歲。

(四)BIGBANG篇
韓國天團BIGBANG嘅成員都已屆入伍年齡，去年先有T.O.P入伍，今年就輪到隊長G-DRAGON（GD）、太陽和大成都分別於2月及3月入伍，現時僅餘下勝利未當兵。而BIGBANG五子今年都有唔少事情發生，好似GD年頭就被爆同After School前成員珠妍秘遊濟州，又被踢爆隱瞞碩士學歷，疑走法律罅逃兵役，到入伍後又被指治療腳傷時疑享特權入住特別病房，受到爭議。而30歲嘅太陽今年2月同拍拖4年多嘅初戀演員女友閔孝琳結婚，成為隊中第一位人夫。

(五)分手篇
今年有唔少韓星認戀，但同時都有唔少情侶分手。好似「國民初戀」秀智去年11月同「長腿Oppa」李敏鎬分手，今年3月就認戀《鬼怪》「地獄使者」李棟旭，兩人拍拖數月即於7月宣佈分手。而宋承憲同大陸女星劉亦菲，兩人因合作大陸電影《第三種愛情》而撻着，不過因長期分隔異地，令佢哋呢段維持兩年半嘅中韓戀正式玩完。

(六)拍拖篇
唔少韓星都因為拍劇或者合作而撻着，當中「馬舞女」泫雅出道以來從未公開戀情，不過今年8月泫雅就高調認戀同門師弟團PENTAGON嘅成員E'Dawn，兩人更已秘戀兩年，即時激嬲二人所屬嘅CUBE事務所，兩人先後被踢出公司，但兩人懶理繼續高調放閃。另一位首度公開戀情還包括《Doctors》28歲女星朴信惠，雖然朴信惠多年來曾同張根碩、李敏鎬、李鍾碩等傳緋聞，但去年被指與27歲韓劇《奇怪的搭檔》男星崔泰俊撻着，不過當時朴信惠否認戀情，直到今年3月因被傳媒拍得約會照，最終朴信惠才公開認戀。

(七)BTS熱潮
韓國人氣男團防彈少年團（BTS）出道五年，喺世畀各地擁有極高人氣，更成功走紅歐美，喺當地開騷之餘，推出嘅專輯亦成為全球各流行榜嘅冠軍，更係外國頒獎禮嘅常客，先後喺《Billboard音樂頒獎禮》，《全美音樂獎頒獎典禮》、《第44屆People's Choice Awards》等頒獎禮上獲獎。同時BTS更成為首隊韓團登上聯合國基金會主辦嘅「Generation Unlimited」活動，隊長RM更全程以英語喺現場致辭，足證BTS嘅人氣已席捲全球。